炎炎夏日天氣之下，一班無綫劇集《飛虎II》嘅演員噚日着晒制服包到冚，喺沙田拍外景，現場仲有幾部警車做實景坐鎮，感覺逼真。呢場戲講飾演飛虎隊嘅馬德鐘、梁烈唯、羅仲謙圍剿捉捕戴黑帽蒙面又戴上黑口罩嘅李思捷。鍾嘉欣就演刑事情報科卧底，同馬德鐘雖然做情侶，但原來少少親熱戲都冇，嘉欣BB話：「連錫都唔使，好好撈，交代我同佢都咁man，望吓算啦。」為咗未來演唱會可以着靚衫見人，嘉欣BB話拍劇特別注重唔可以撞到損手爛腳，以免令粉絲失望。
暴食補體力
眼見一班猛男不停流汗，真係擔心隨時中暑，難怪馬德鐘話要不斷食嘢補充體力，仲好期待大家可以擦餐勁。《衝上雲霄II》收視創佳績，有份參演第一輯嘅馬德鐘唔知有冇飲恨？佢話：「唔會，見到佢哋咁有型，都勾起我好多回憶，我𠵱家着住第二種制服，希望第日兩套制服可以出現同一劇集。」不過錯失參與《衝II》機會，馬德鐘話：「上集講我死咗，而且當時合約又喺鹹淡水交界。但咁多人鍾意，又提番第一輯都係好事，有第三集我都想拍。」
撰文：馮仁昭
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！