編按：是日由盧主席秘書Joycelyn執筆。
幾經辛苦，上周五先撲到飛睇Eason個唱，其中一個亮點就係有表演嘉賓，我諗好多人都會介意他的演唱會有嘉賓，除非佢係——歌神。不過當他倆喺台上商量唱乜嘢歌的時候，小秘心中不斷祈禱，唱乜都好，千祈唔好係「同舟之情」。幸好，最後兩人唱了「每天愛你多一些」，唔係就壞了全晚的美好。
「同舟之情」是「家是香港」運動的主題曲。「家是香港」是偽689政權上任後的重頭活動，希望可以為香港注入正能量，加強社會凝聚力同埋……一大堆口號。
其實要市民把香港當作自己的家，方法好簡單，政府根本唔使搞咁多無謂花臣，只需要全民普選，一人一票選出代表自己嘅行政長官和立法會就得啦。市民有得參與，對香港的歸屬感亦自然增加。其次，就是少破壞多建設，保留香港人多些集體記憶，例如遺下不少我兒時足迹的舊天星碼頭，sorry粉嶺高球場從來都唔係囉。三者，言論自由是香港其一核心價值，多少港人，莫講話斯諾登都以這個小島的自由自豪，但政府偏偏又再推出網絡廿三條《版權草案》的諮詢，有扼殺市民言論和創作空間之嫌。試問，彼此都不能暢所欲言，算乜嘢一家人呢？
用腳表達愛港之情
政治經濟學大師Hirschman曾經講過，人面對不滿時，可以用雙腳去表達不滿，亦即出走（exit），又或發聲（voice）或忠誠（loyalty）。簡單來說，遇有不滿，一係走佬；一係就會狠狠地表達訴求；一係留低默默承受。呢三種不同反應，亦反映人民對政府鍾愛程度，你可以選擇盲目地愛，以「留低」的方式顯示愚忠。又或者學似李超人以「賣嘢撤資」示警。但若論深愛程度，還不如選擇留低並「發聲」的人們，佢哋對此地充滿期盼，並冀望透過改變，而非逃脫去開創未來。
今年6月4日晚上，雷電交加，傾盆大雨，身在維園的我，除了濕透那副放工後的疲憊身軀，還有我那對最鍾愛的Stuart Weitzman，無非想遙遠寄上24年不變的悼念。沒幾天後的7月1日，又係大雨照頭淋，但呢次仲要係困在維園幾個鐘，不過亦都阻止唔到我抵達中環。其實我講咁多、發咁多牢騷只是想告訴689同中央政府，很多市民肯犧牲自己寶貴的時間出來遊行示威，並不是想為社會添煩添亂。我們出來遊行的出發點先係真心愛香港，愛中國，以香港為家，視祖國為鄉。
試想想，查實我去遊行示威的opportunity cost好高的，原本我夜晚收工或美麗的星期天，可以和好姊妹去happy hour，或者返屋企飲媽媽煲的靚湯，又或者嘆冷氣，睇C9劇，甚至煲韓國的running man。如果不是為了吾家吾鄉，我根本犯不着攞苦嚟辛，在滂沱大雨下唱「自由花」，又或罵「梁瓜」。
愛之深責之切，當每年7.1都有數以十萬人上街，用雙腳發聲，換個角度想，689政府知道，起碼仍有咁多熱愛香港的市民，誠心為社會公義和小島將來舉步。到底幾十萬人上街示威好，還是幾十萬港人移民離港好，條數點計，689政府甚至中央政府應該要好好諗清楚，再唔係就參照李氏啲數口。
Joycelyn
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange