每次睇完占士邦，總羨慕又妒忌，唔係貪佢靚仔身手好，只因身邊美女如雲！即將發售嘅PS3遊戲《Killer is Dead》屬18禁類別，玩家除了變身為殘酷版邦叔，不停大量斬殺、肢解外，類似「007」高科技武器，更慘變贒女透視鏡，戴起佢，即睇到一班內衣少女通街走，實行玩到你見完血，再噴血！
記者：陳國輝
攝影：林栢鈞
港版噴血殺手
Diva：扮演Vivienne
性感嘅緊身衫，身材澎湃，原來佢係主角上司，總會在危難時出場。
Ava：扮演Betty
年屆256歲的德籍吸血鬼，專揀強壯男性，利用色誘吸乾全身血液。
Mika： 扮演Scarlett
主角助手，佢戴住嘅透視鏡能看穿對方內衣，當然最後送咗畀主角啦！
四種懲罰 招招殘忍
玩動作Game最緊要爽、快啫！《Killer is Dead》雖未至於《無雙》系列1對100咁誇張，但過癮處在於提供各式騎呢武器，方便招呼敵人。唔講唔知，其實Mondo Zappa由半人半機械構成，左手係一隻超合金機械臂，平日似普通人，但每次打起嚟，佢能隨意變化成四種武器，例如激光炮、巨形電鑽，甚至凍槍，不過殺得最爽始終係日本刀！事關佢除咗提供連續斬技，出現大量標血畫面之外，臨門一刀，更有招「最後審判」，畀你從暗殺、虐殺、處罰、執行四項中選擇一瓣，了結對方。例如你揀「暗殺」，就可以從後把敵人身體刺穿，令佢肚破腸流；選「執行」，則變身成一名劊子手，將敵人按低，然後採用行刑式斬甩頭顱，聽落都覺得恐怖！
現場提供第六章試玩，由於畫風比較獨特，令夜晚背景變得又紫又藍，有啲似負片，玩一陣就覺得刺眼！至於動作部份好暢快，但留意轉換大型武器會好煩，變回第一身視點，仲需要儲一陣氣先可以開火，唔及直接搵日本刀喪劈咁爽囉！
睇穿女人心 送禮升呢
打打殺殺等血腥鏡頭，固然係《Killer is Dead》焦點所在，但如果想獲得重要情報及特別道具，識打都未夠，仲要識𠱁女仔！遊戲特設「花花公子任務」，此時主角要進入酒吧，跟靚女見面，你嘅目的就係要上前搭訕，𠱁佢開心，然後當情緒達到Max時，便向對方送禮同表白！無錯，遊戲另一部份等同追女仔環節，最搞鬼係你除咗可以陪佢飲酒、傾偈，甚至輕撫佢之外，主角還可以戴上私伙透視鏡，欣賞美女的豐滿身材，來提升情緒指數，也可睇穿女性的心思！不過，贒女總有尺度，假如你眼定定望住人，隨時被靚女兜巴星，到時唔該你重新玩過！
《Killer is Dead》
類型：動作
平台：PS3
開發：Grasshopper Manufacture
玩家：1人
推出日期：8月1日（日文）/9月1日（中文）
日頭打卡返工 夜晚殺人
兇殘成性、惡形惡相，總會有樣你睇！但主角Mondo Zappa係一位外貌斯文四眼仔，同樣過返工打卡，朝九晚五嘅職場生活！但佢真正身份，竟然係國家秘密組織殺手，由於天生嗜血，專門揀晚上，以極殘酷手法，包括切手、切腳，再斬甩頭顱來解決敵人，並透過美色填補心靈空虛，令精神與肉體，維持顛峯狀態。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange
倪匡、蔡瀾同肥佬黎約埋一齊《亂噏24》，你睇咗未？ 唔睇冇話題，第二集足本放送中！速上：
http://hk.apple.nextmedia.com/livestream/channel/talk24