一九八○年代中期開始，不少香港人移民外國，女士帶肚到美國生仔，六四事件之後，移民潮更急，於是有不少今天二十至二十八歲嘅年青人係在外國出世嘅。當年移民嘅理由係「為咗下一代」。點知下一代長大成人之後，又跟隨父母回流香港搵食，揸住外國護照，滿口英文，呢類人不時在蘭桂坊、蘇豪區出現，結隊成群，不知幾快樂。
但係若果揸住本美國護照，去銀行或財務機構開戶口，就認真煩人煩己，煩到一啲本地基金公司、經紀行根本唔想做美國公民生意。中型經紀行老闆F對左丁山講：「股市波幅大，成交少，已令我非常頭痛，冇啖好食，唔好彩以前收咗幾個美國客，直情煩死大老爺，我正想辦法想趕佢地走，但又驚佢地向證監會、甚至平機會投訴，我重未諗得掂。」原來白人、黑人入到嚟開戶口就易辨認係唔係，一味留難到佢地知難而退啫，但台灣客、大陸客、本地客入到嚟，拿出中華人民共和國護照、中華民國護照、本港身份證，報本港地址，但隱藏咗美國綠卡/美國護照，你點問呀！日後偶然因其他原因發覺，就要照美國Foreign Account Tax Compliance Act （FATCA）（外國戶口稅務合規法案），向美國稅務局報告戶口交易，否則嘅話，基金公司或證券行如果有在美國土地買賣美國證券，就會被美國稅局抽30%稅，（withholding tax），或不做美國生意。
美國政府咁鬼霸道，要外國公司代為執行稅法，破壞外國私隱條例，直情係侵犯外國主權，如果中國要求美國境內銀行呈報所有居美中國大陸人士嘅戶口資料，你估美國國會會有甚麼反應？強權冇得反抗，所有居港美國人、美國永久居民，即使佢在美國出世之後幾日就返回香港未曾在美國讀書、工作，但未正式向美國領事館申報放棄美國公民身份，肯定會受到FATCA影響。英國比較文明，持英國護照而不在英國居住及工作，就不必交英國稅。老闆F為咗幾個美國客，頭痛之餘，又大罵港交所豈有此理，要經紀行向意大利政府提交意大利公司Prada（1913）呢隻股票嘅金融交易稅（0.22%），簡直擾民，佢嘅對策就係勸退客戶買Prada股票，除非買好多！