新特蘭、曼城、熱刺同曼聯4支英超球隊，由今日起將會一連9日陸續襲港，「飛人牌」可能嫌香港球迷唔夠high，搵埋旗下嘅比歷克格芬、基斯保羅（CP3）同安東尼（Melo）3位NBA巨星，搶先今午抵港嘅「黑貓」一步，朝早9點零5分就現身理大，實行搞㷫香港！
格芬3子今訪理大
快艇孖寶格芬、CP3同埋紐約人球星Melo，3子由上周一起，先後走訪過北京、上海同廣州，而佢哋原定噚日去埋台北，就結束一連4站嘅「飛翔之旅」；點知3人突然送個驚喜畀香港球迷，噚日宣佈臨時加插香港為最後一站。佢哋噚晚完成訪台之旅，已即時轉飛香港，今朝9點零5分會去理工大學邵逸夫體育館舉行嘅訓練營，指導15個協青社嘅年輕球員；話唔定首次訪港嘅2011年入樽王格芬，會同前年已嚟過香港嘅隊友CP3，合演「拆你屋」㖭。
不過，3子今次訪港唔係公開活動，除咗應屆甲一3冠王南華兩位功臣「占士」陳翊麟、Duncan惠龍兒，同埋早前夏登訪港幫手做助教嘅Nike League U19 MVP易漢暉，有幸同場幫手指導小將之外，其他球迷想一睹3位球星嘅風采，或者要去理大一帶碰吓運氣。
曼聯壓軸周六抵港
如果唔好彩追唔到「飛人牌」3星唔緊要，事關仲有一班英超球星等住你。巴克萊亞洲錦標賽嚟緊周三喺大球場上演，揭幕戰鬥熱刺嘅新特蘭，今日下年1點零5分就率先抵港，而星光熠熠嘅曼城同熱刺，就分別喺聽朝同下晝殺到；曼城同熱刺都有公開活動，前者周二去旺角，後者周四就喺尖沙嘴，球迷又可以追星喇。雖然熱刺球星加里夫巴利，日前因傷避戰0:0賽和高車士打場友賽，但球會大派定心丸，指呢位英格蘭足球先生傷勢無礙，可以隨軍抵港。
至於衞冕英超嘅曼聯，將會壓軸喺下周一（29號）同傑志拍跳，為一連9日嘅巨星襲港之旅完美作結。據悉紅魔大軍賽前兩日，即27號巴克萊亞洲錦標賽決賽當晚就會殺到，唔知新帥莫耶斯，會唔會入大球場睇吓宿敵曼城嘅表現呢？
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange