曼城換上新帥比歷連尼喺新球季領軍，點知頭威頭勢就冇份，周四喺南非進行嘅第2場熱身賽又輸，1:2不敵當地球隊阿馬祖路，遭逢兩連敗。比歷連尼因為家事今仗冇領軍，佢同埋新兵尼格度將會喺下星期直接去香港同大軍會合，另外曼城亦都即將再增兵，收購祖維迪單交易已經七七八八，如無意外都會嚟埋同香港球迷見面，出戰巴克萊亞洲錦標賽。
1:2不敵阿馬祖路
曼城頭兩場熱身賽都喺南非進行，首戰0:2輸畀超級聯盟之後，到周四喺德班出戰另一支南非球隊阿馬祖路。曼城今場依然強陣，上場受傷嘅耶耶托尼亦有披甲；喺開賽20分鐘失波後，藍月亮用咗6分鐘就由占士米拿扳平；完場前1分鐘，後備入替嘅小將拉薩克犯錯失咗控球權，再喺禁區侵犯對手輸12碼，阿馬祖路由尼亞丹保操刀入網，奠定2:1勝局。比歷連尼喺呢場波唔見人，原來係因為家事要即刻趕返智利屋企，有傳話係佢媽媽病咗，點都好希望比帥家人平平安安啦。
曼城喺南非表現麻麻哋，不過始終都仲未係最強人腳，球會喺日前簽咗尼格度之後，周四亦同費倫天拿傾掂數，同意以2,600萬鎊（約3.04億港元）羅致黑山前鋒祖維迪。
祖維迪已經執好行李飛咗去英國，仲話：「曼城咁睇得起我實在令我受寵若驚，希望可以喺英超贏到錦標。」咁睇呢單交易都十拿九穩，曼城今夏嘅轉會費支出亦會直逼1億鎊大關。
兩新兵勢來港
曼城好快就會離開南非，大軍喺下周一早上就會飛到嚟香港，備戰下周三巴克萊亞洲錦標賽首戰對南華嘅比賽。預計即將會成為曼城球員嘅祖維迪應該會亮相，而比歷連尼同尼格度都會嚟會合之餘，大衛施華同捷西斯拿華斯亦歸隊，到時香港球迷將會睇到幾乎最強人腳嘅曼城，真係大飽眼福。
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第二集足本放送中！速上：
http://hk.apple.nextmedia.com/livestream/channel/talk24
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange