余文樂近日經常要為電影《飛虎出征》宣傳同謝票,又要幫自己隊籃球隊出賽兩邊忙。噚日稍為空閒有番啲自己嘅時間,點知就出事。
話說樂仔喺Instagram放咗兩張相,一張係佢抱住小朋友坐司機位,另一張係小朋友自己坐司機位揸住軚盤嘅相,睇落架車有啲似樂仔架新車,車價約80萬嘅Range Rover Evoque。
不過點睇位小朋友都未夠18歲,所以有網友提醒樂仔可能觸犯法例之後,樂仔已經極速刪除咗兩張相。
稱冇插車匙
之後佢接受電話訪問時表示係一時失策,佢話:「雖然當時冇撻車同冇插車匙,同埋喺私人地方,為時亦唔係好耐,但都知道咁做唔啱,係唔為意至咁做,下次一定唔會。」佢補充話平時自己係個負責任嘅駕駛者。
好在樂仔當時唔係開住車,因為咁做可大可小,前年就試過有個爸爸喺YouTube放咗一段抱住個仔教佢揸車嘅短片,位小朋友事後俾網友稱為「頭文字B」。嗰位男士同太太最後被起訴「涉嫌危險駕駛及慫恿他人危險駕駛」嘅罪名,分別判咗160小時社會服務令同停牌半年。
撰文:馮仁昭
倪匡、蔡瀾同肥佬黎約埋一齊《亂噏24》,你睇咗未?
唔睇冇話題,第二集足本放送中!速上:
http://hk.apple.nextmedia.com/livestream/channel/talk24
逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://add.appledaily.com 睇番足本網上版,除咗有專訪外,仲有好多時裝靚嘢睇!