民建聯真係好鍾意派嘢，八方翻查議員開支紀錄，發現元秋蔣麗芸喺今年農曆新年前夕，開咗差不多8萬蚊公數整咗3萬個迷你月曆、10萬個利是封再加7萬幾張揮春派街坊，佢嘅黨友不遑多讓，Tree根同李慧琼及立法會主席曾鈺成夾份用咗近2萬銀公帑，整咗萬三個月曆派通街。其實《蘋果》前年話過佢哋嘅主席譚耀宗豪花20萬狂印100萬個利是封同4萬個年曆，但佢哋堅持跟隨主席路線喎。
元秋回應時話自己係新人，見新年流流，咪諗住印呢啲嘢畀街坊開心吓囉，但問心嗰句，佢都覺得咁做唔係好環保喎，所以出年唔再整，亦強調好在今年都派得晒，冇嘥到嘢囉。