唔賭唔知時運高，好天唔知把遮老，近日細雨綿綿，中環人張開破傘，總會想起卑利街何伯。人稱遮王的何洪希，大半個世紀以來在此修遮造傘，客人除了街坊鄰里，還有中環OL、外國領事，甚至英國皇太后。他更曾擠身世界紀錄，製造出全球最貴的雨傘。何伯現年88歲，沐雨櫛風70載，身子大不如前，每每關門休養，回憶70年流金歲月。
記者：中環特工隊
中環卑利街近堅道，有間用鐵皮及木板搭建的檔子，單是檔旁豎立的招牌「何希記造遮」也有逾60年歷史。檔主何洪希是順德大良人，30年代跟隨父母來港，當時不過三歲，在深水埗南昌街三達學校上了兩年課就輟學。
時光倒流70年，他十多歲時跟隨其後的姐夫學習修理雨傘這門手藝，不久便添置一部單車，千里走單騎，走遍港九新界修傘。單車前架載傘，尾架載工具，車身中央還有個招牌：「為群眾修理雨傘」。當年修理每把傘只收五毫，現在五毫只夠買個網上發帖。
何伯憶述：「以前我踩單車四圍去幫人整遮，踩去元朗啊，青衣嗰啲地方。我當年住深水埗，由深水埗踩去元朗，要成日㗎！」
直至一次乘搭渡海小輪往港島開工，偶然踏進卑利街，獲該處的鞋店東主關照。「舊底對面係賣鞋嘅，好多馬姐喺度出入，我就喺度擺吓，嗰個老闆就好心，佢話：『使乜咁辛苦呀，四圍去整遮，你就喺我門口擺檔啦！』仲租間房畀我住，15蚊租，嗰陣時15蚊好多錢㗎喇，咁就做到今時今日啦！」
追憶似水流年，留下的只有人情，「我為公眾服務，嗰時任人哋畀，係一點心意，我有時唔收人錢都有，有個姓黎嘅人，搵朝唔得晚，佢好困難，佢困難之中都要用遮，我睇到就幫佢做（修理）。我到𠵱家都係為公眾服務」。
今日社會富裕，人人敵我分明；那年頭生活艱苦，反而互相扶持，「試過有一個女人，孭住一個仔，拖住一個女，個大女行先，嗌肚餓，我見佢咁淒涼，攞個銀仔出嚟，我畀個家姐，我話你拎去買嘢食啦，買麵包大家食啦，佢仲千多謝、萬多謝我」。那時候香港人有禮，即使販夫走卒也懂得尊重別人，「老實講，待人要有禮貌，就算乞食都稱呼佢阿伯」。
創鍍金遮 打入健力士紀錄
何伯由寂寂無名變聲名大噪，全因一次為英國皇太后修理雨傘，「佢啲工人識得嚟呢個地方搵我，話把遮爛咗，叫我同佢趕快整，我問佢邊個用，佢話英女皇個老母，即係皇太后，咁咪寄過嚟香港叫我整囉，𠵱家嗰把遮喺美國展覽館」。1995年何伯製造出牛皮傘，遮骨鍍金，當時更以167英鎊打入健力士世界紀錄大全。
如今何伯年近九旬，有八子一女，兒孫滿堂，但仍然堅持為群眾服務，只是過往單獨看檔，今日則要妻子攙扶。何伯記性日差，只好從投注站取來大叠六合彩彩票，寫上「陳生」、「李小姐」，貼在傘上，分辨物主。
訪問當日OL梁小姐幫襯，她對記者說：「以前未幫襯過，喺呢度返工，把遮壞咗，𠵱家買把遮好平，但唔想嘥咗佢，因為把遮好特別，濕水時會有櫻花，所以想整番好佢。𠵱家修理60蚊，靚呀！伯伯犀利，掂！」何伯不一會便修理好，不忘叮囑：「整好喇，梁小姐，開遮時向上，唔係好容易會爛！」
中環爆料熱線
WhatsApp：9499 3777
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第一集足本放送中！速上：
http://hk.apple.nextmedia.com/livestream/channel/talk24