上周末到曼谷一遊，住在四季酒店，呢次包咗另一架小巴，可載十人，司機係華裔，識少少廣東話，可用普通話溝通，咁就掂晒，唔似得上次四月之旅，司機好則好矣，可惜只係識泰文，畀指示佢自然冇咁爽神。今次呢位司機專營中台港旅行團（小團），車牌9688，幾好聽，點知佢對廣東話識啲唔識啲，在車頭印上中文「走路發發」，左丁山睇到，咭一聲笑出嚟：「走佬仲點會發發呀。」
四季與St. Regis對面就係皇家曼谷體育會（Royal Bangkok Sports Club），有馬場跑道，跑道包圍馬場內係九洞高爾夫球場，會員若住在St. Regis住宅，行過馬路就可以打波，方便到極點，直情係富豪級享受，幾曾見有高球場就在繁盛區鬧市中心內呀。講地價，呢個球場當然價值連城，難以估計。在曼谷要加入呢個RBSC，聽泰國朋友講，難過登天，並非純粹有錢就可以嘅。
十幾年前去馬尼拉，一位大富華僑招呼左丁山去馬卡蒂高爾夫球會所（Makati Golf Club）飲下午茶，原來會所距離中心商業區嘅半島酒店好近，記得揸車十零分鐘就到，一入到大閘，嘆別有洞天，係一個高爾夫球場，華僑笑笑口對左丁山講：「如果喺香港，呢個高球場就似在中環行過去灣仔，你話幾方便呢！」直情方便到冇得彈啦，華僑知道香港人心意，跟住話：「唔好講地價嘞，會係天文數字，依家入會好艱難，好艱難。」
曼谷與馬卡蒂呢兩個市中心高球場，是否政府批地如粉嶺高球場，左丁山無考究，新加坡大概有樣學樣，特登在海濱填海區建造咗一個市中心高球場，恨死香港人，不讓馬尼拉、曼谷專美。新加坡於2030年土地規劃可能收番高球場、軍事用地與農業用地嚟興建房屋喎，有排未係，況且新加坡有18高球場，收回一兩個較偏遠嘅就得啦。星期天晚上，坐車去Zanotti吃意大利餐，經過RBSC，問司機：「明天有無馬跑？」司機話：「依家只係在皇宮附近嘅馬場跑馬，呢個場專係用來打高爾夫球，賽馬在泰國不是興盛事業。」泰國商人對打高球興趣大過賽馬好多，RBSC場地不跑馬，專作高球之用，可以理解。