呢一代嘅無綫小花主播以「淚」聞名；上一代呢？當然以實力取勝。原來幾十名無綫「那些年」高層、主播同記者，日前喺由傳媒人開嘅TC2聚首一堂，席間梗係論盡新一代傳媒風氣同採訪手法。
八方聽聞，當晚嘅TC2星光熠熠，久未露面嘅傳媒教父「吉叔」黃應士同太太一齊出席，𠵱家任職有線電視高層趙應春，以及仲有好多人記得嘅陸嘉敏等名記者都有現身，呢位新聞小花好受歡迎，在場人士變晒「粉絲」，爭住同佢影相。新近啲嘅李家文同呂秉權亦有參加老鬼聚會。
鄧惠鈞自爆月底last day
查實呢班前新聞部TVBuddy得以「大團圓」，源於前記者余紫玲由美國返港，佢喺中大新聞與傳播學院新書《一人又一故事》以一篇《是兵還是賊？》文章攞咗冠軍，順道約埋舊同事敍舊慶祝。
上任僅僅九個月就以「眼又矇、耳又聾」跳船嘅新聞統籌專員鄧惠鈞June都有出席，據知佢席間不知幾精靈，仲同人講今個月底就last day！至於邊個接棒？在場資深傳媒人七嘴八舌話搵AO做番算啦，據聞阿June都好認同囉。
mailto:[email protected]