上周帶大家去聖士提反灣曬太陽，今個禮拜轉場過海，推介另一隱世沙灘；要數西貢的「飛佛」，個人最愛出名水質靚的銀線灣，人同車都比附近的「大清」少一截，極速泊好車就能直奔海灘！
記者：姚子浩 攝影：許有達 模特兒：Vivi Choi@Starz People
寧靜人少 易搵車位
西貢一帶海灘水質佳，不過人怕出名豬怕肥，莫講假日，就連閒日都有不少人慕名而來，搞到人車互擁水洩不通。就以「大清」清水灣第二灣泳灘為例，假日早上八點近二百個車位已開始「缺貨」，十點打後想不用排車位，簡直癡心妄想。就算好彩泊到車，落到海灘四周盡是泳客，換衫、沖身、買汽水樣樣要等，都幾掃興。與其跟人鬥逼，不如揀個巴士及小巴都去不到的泳灘，如距離大清只約15分鐘車程的銀線灣，便是不錯選擇。駕車的話，同樣由坑口的坑口道或影業路直上，去到迴旋處取道銀線灣方向，沿銀線灣道落斜第一個路口右轉便到。泳灘雖小，卻有約60個兩小時咪錶位，另設約10個電單車位，算非常充裕，網上許多車友也推薦這泳灘，認為暑假兼周末，也不難搵位泊車。
配套充足 略嫌灘窄
輕輕鬆鬆泊好車後，當然第一時間飛奔至海灘。不過由停車場落海灘，先要落一條長長的樓梯，出發前最好檢查清楚無遺留東西，否則再行樓梯返轉頭已經無氣再游水。銀線灣屬香港康樂及文化事務署管轄的泳灘，救生員、更衣室、淋浴設備一應俱全，雖然海灘較細和窄，但勝在水質長期處於良好清況，又有防鯊網和浮台，模特兒Vivi落水游了幾轉，都讚夠乾淨舒服。配套方面，就有小食亭和48個儲物櫃，租太陽傘買飲品都很方便。不過救生員哥哥跟我們說，小食亭老闆很有性格，雖是每日營業，但幾時開門就視乎老闆心情了。
抵讚
1. 需駕車，相對少人。
2.錶位足，不用煩車位。
3.水質長期達良好指標。
要彈
1. 路牌指示不夠清楚。
2.海灘較窄和細。
3.上落要走長長的樓梯。
慳油小車 空間靈活
同朋友開車去海灘玩水，部車有型夠力水是其次，最緊要還是夠實用空間，放得落所有裝備兼坐得舒服。今次這款豐田Ractis Plus Verso就非常稱職，小巧車身行清水灣一帶的彎路，表現靈活，1.5L直四VVT-i引擎上山都十分夠用，最重要是慳油，20.7km/L的油耗計落只需$0.8/km，就算家住港島入西貢也算值得。雖然車身小小，不過尾箱空間出奇地大，足夠放三、四人的沙灘用品，放平後座容量更大至1,388公升，就算將浮床吹定氣都放得落！
Toyota Ractis Plus Verso
售價：$198,820起
查詢：2884 7999（皇冠汽車）
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第一集足本放送中！速上：
http://hk.apple.nextmedia.com/livestream/channel/talk24