上個月喺友賽恥辱性輸咗畀泰國嘅中國國家足球隊，噚日朝已經起程去咗南韓，準備聽日展開嘅東亞錦標賽，由於中國隊主教練甘馬曹已經走人，中國足協除咗搵咗傅博做代理主教練領軍，前港隊教練、現中國足協技術顧問郭家明亦臨危受命，隨隊領軍；不過，郭指導噚日話，佢只會提供意見。
任技術顧問提供意見
中國國家隊上個月友賽主場1:5輸咗畀以年輕球員為主力嘅泰國隊，震驚國內球壇，西班牙主教練甘馬曹被震落馬。國足為應付東錦賽決賽周，早排已經委任咗傅博同區楚良等甘馬曹嘅助教做代理教練；而佢哋仲重召杜威等前國腳，希望對住日本、南韓同澳洲爭番口氣。
中國隊大軍周初已經喺北京香河集訓展開備戰，由於今次東錦賽可以話唔再衰得，中國足協決定安排周二先返到北京嘅郭家明以國足技術顧問身份隨隊；為教練傅博為首嘅教練團提供意見。影全家福時有「智多星」之稱嘅郭家明亦列席，噚日朝仲率領國足起程去南韓㖭。
「唔會干預主教練決定」
郭家明噚日話：「本來冇打算隨國足去南韓，但甘馬曹離任，足協希望我可以響東錦賽期間向主教練傅博提供支援，但只屬短期性質。」郭sir，經驗同資歷都極之豐富，所以2010年獲中國足協邀請擔任技術主任，主要負責青訓同教練培訓；而郭sir曾經講明唔會涉足國家隊，今次破例，可以想像國足情況有幾嚴峻。
郭家明話：「唔好用『救國足』呢類字眼，因為只會為國足提供意見，亦唔會干預主教練任何決定，所以仲係喺幕後。」隊長鄭智就話，球員要記住泰國慘敗帶來嘅教訓，往後要做係團結一致踢好每場賽事。國足周日先對日本，之後對南韓，最後一場對澳洲。
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第一集足本放送中！速上：
http://hk.apple.nextmedia.com/livestream/channel/talk24