是否一次不忠，就百次不用？三位智者看法不同，令去年難忍男友偷食而分手的娜姐大感困惑。肥佬黎稱男人偷食一次罪不至死，更笑說很多時候也泛起偷食念頭，只是想不出神不知鬼不覺的方法，故結婚二十多年來都未試過。
周：咁如果男人偷食呢？
蔡：（搶答）男人偷食係正常㗎，哈哈哈！
倪：但係偷食唔正常喎。
黎：佢話偷食啫，唔係偷情。
倪：偷情唔正常喎。
蔡：乜都正常呀！
倪：偷情唔要得啦，偷情係移情別戀嘛。
周：所以偷情同偷食就唔同？
倪：差好遠呀。
黎：（認真）但係男人有時會唔會真係犯錯，偷咗食……
周：其實女仔都會㗎。
黎：有，但唔好話一次就釘死佢。偷情就冇得傾。
蔡：你要去睇呢個男人係唔係多情囉！
（眾人起哄）
黎：多情都唔可以偷情嘛大佬！多情就仲大鑊！千祈唔好要多情嘅男人呀！但我覺得呢，我結咗婚廿幾年，我未偷食過一次。
周：（插嘴）咩叫……
黎：即係未同過另一個女人上過床。
周：（又插嘴）你冇偷食，但你有偷情！
黎：（沒理會）但我覺得如果一個男人真係偷食一兩次呢，我覺得可以原諒，雖然我自己未做過。人有時係會有軟弱時候，有好軟弱時候。有啲女人好……騷得好緊要，你真係冇辦法……
周：有陣騷味呀！
黎：我話畀你聽，狄娜唔係靚，我有次上去佢節目，個心跳，卜卜聲。如果你遇到一個咁嘅女人，而你嗰日真真正正係最軟弱時間，喂你有時真係偷咗食喎，咁唔通你返去同佢離婚咩？你話長期偷食，咁梗係離啦，搞到烏煙瘴氣，但有時一個人錯一兩次，我唔覺得係死症嚟。偷情就冇得傾。
周：但係你有心跳感覺喎。
黎：吓？心跳感覺係鹹濕啫，鹹濕就OK嘅，係咪？
倪：學吓蔡生話齋，正常（又笑）。
黎：但老實講，我未試過，廿幾年嚟未試過。你話想唔想，想，好多時我都想。
蔡：上帝話你想就係㗎啦！
黎：如果真係神不知鬼不覺可以做多呢，我諗我做咗，我諗唔到一條橋可以神不知鬼不覺嘅，真係諗唔到，以我咁聰明都諗唔到一條橋，所以我最後都唔敢做呢樣嘢。
（眾人大笑）
周：所以你連諗都唔好話畀我哋知。
黎：所以呢個節目千祈唔好俾我老婆睇到呀大佬！
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第一集足本放送中！速上：
http://hk.apple.nextmedia.com/livestream/channel/talk24