因為之前喺無綫劇《老表，你好嘢！》而紅咗嘅「細細粒」陳嘉佳，𠵱家除咗接多咗廣告搵銀之外，無綫有唔少劇集都預佢一份，可能貪佢「抵用夾大件」，行出嚟都已經好有喜劇效果！呢排拍緊無綫劇《貓屎媽媽》嘅細細粒，前幾晚見到佢戴晒口罩喺灣仔出現，唔通佢捱病咗？睇真啲原來佢係拍緊外景，呢個係佢嘅造型，冇幾耐見到佢同埋10幾個臨時演員，喺通利琴行門口扮fans，門口就放咗張寫住「永遠懷念Leslie」嘅牌。
拍到身水身汗
跟住劇情發展簡單又好笑，見到戴住口罩cap帽、打扮得好可愛嘅細細粒，諗住混入fans堆入面，不過因為身形太過突出，所以好快就畀fans認出細細粒嘅身份，趕佢出隊頭。之不過因為要拍唔同鏡頭，所以前後都拍咗超過一個鐘，拍得耐加上條街冇乜風，又有幾盞大燈射住，熱到肥大嘅細細粒身水身汗，難得佢又唔黑面，全程見佢咪咪嘴笑，仲同班工作人員、臨時演員有傾有講，唔使埋位嘅時候，就不停抹汗同撥扇，佢咁識做，難怪監製專登喺戲入面安排條感情線畀佢，畀佢同王浩信做一對，雖然到劇情中段細細粒知道王浩信心意，主動退出成全佢，不過總算俾細細粒滿足吓啲少女情懷！
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！