周秀娜去年發現髮型師男友陳偉成偷嗒𡃁模，火滾斬纜，當然她好奇男人偷食心態，蘋果動Live新節目《亂噏24》錄影當日，她跟蔡瀾、倪匡和黎智英熱烈討論，昨晚播的一集，蔡瀾認為偷食和偷情都沒問題；倪匡認為偷情等同移情別戀；肥佬黎敢想唔敢做，他自爆曾被狄娜電暈，心肝卜卜亂跳。《亂噏24》逢周四晚上11時播出，可在http://bit.ly/appletalk24重溫。撰文：比華利
黎：黎智英 蔡：蔡瀾 倪：倪匡 周：周秀娜
鄧麗君被公認是人靚聲甜，後期的她更是越來越靚，全因有了自信。不過蔡瀾忍不住大爆當年鄧麗君來港時的瘀事。
黎：一個女人靚唔靚，係我覺得同你嗰日個mood，同你對佢嘅感覺係點係好大分別。情人眼裏出西施係事實。
蔡：好多好多，內地又好台灣又好，起初嚟香港，唔得就唔得，但係慢慢睇、慢慢靚㗎。同埋呢啲女人自己有自信心，就越睇越靚。
黎：自信好緊要。
周：其實佢嗰種靚係生活啦、環境啦，自信係由心發出嚟。
黎：着衫都係，一個人着衫靚唔靚，佢嘅自信好緊要。
蔡：着一件真貨，同你着一件A貨，心理上已經好唔同。
黎：有啲明星未紅嘅時候唔靚，好咗就靚。
蔡：男人女人都一樣。
倪：好多紅星初初來香港都好土㗎。不過土有土嘅好喎，細佬哥嚟（又笑）。
蔡：嗰陣時我喺邵氏，人哋話呀蔡生你去睇吓囉，（已經帶嚟見你，好出名㗎喺台灣好出名）。咁就見，一個肥肥哋肥妹仔，好可愛囉，（唱歌好叻㗎），係囉好叻，（有冇電影俾佢拍呢？）暫時冇囉，咁就送走咗。咁呀何Lily個媽咪就行入嚟：「咁醜樣！咁肥！點得呀！」（眾人大笑）鄧麗君嚟㗎，哈哈！
倪：鄧麗君細嗰時候好好玩㗎，肥妹仔嚟㗎！
黎：佢紅咗都靚，有自信咗就越嚟越靚。
蔡：靚，佢後期靚。
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第一集足本放送中！速上：
http://hk.apple.nextmedia.com/livestream/channel/talk24