40年前的7月20日，李小龍離開了這個世界，從小視哥哥為偶像的李振輝，每年這個時候總特別傷感。身在美國的李振輝接受本報電話訪問時說：「咁後生我哥哥就唔喺度，差唔多呢個時間都會諗番起以前同佢過嘅生活，好大感觸。諗到佢個樣好好笑、好開心喺我眼前，佢係一個好和靄可親嘅人，喺銀幕上見到佢好似好兇狠，其實佢好鍾意講笑，係好開心嘅一個人。」
李小龍的笑臉，李振輝不曾忘記，不過，數歷年跟小龍相處最深刻一幕，卻是1959年李小龍臨赴美國讀書前，在李振輝床前沉重道別。李振輝說：「佢臨去美國之前，走埋嚟我張床，當時我瞓着咗，佢整醒我，平時佢好開心好多笑容，但嗰晚佢好沉重咁同我講，話：『我聽日走啦，離開香港去一個我唔熟悉嘅地方。』佢有少少唔知將來會點，佢平時成日講笑嘻嘻哈哈，唔會同我講呢啲嘢，我永遠好記住，佢係好嚴肅、好無可奈何。」
唔講唔知，李小龍50年代原來曾參加過歌唱比賽。李振輝說：「當年麗的呼聲有個歌唱比賽，佢同大家姐秋源、哥哥忠琛三個一齊參加，三個都入唔到圍，小龍根本一開始就俾人叮出嚟。我仲記得喺屋企聽，不過，我已經唔記得小龍唱乜嘢歌。」
望出《小龍兵法》
除了李振輝，死硬小龍迷歐錦棠亦表示要概括李小龍對後世的影響，三日三夜也講不完，但一句說話已可以說出他的重要性：「佢融會中西加上絕頂聰明，可以話以前冇、以後都唔會再有李小龍呢類人物出現。」小龍對後世的影響可分三方面：功夫、電影藝術跟哲理，歐錦棠補充說：「小龍喺電影有好多紀錄，佢亦都開創咗好多好新嘅拍攝手法，不過電影只不過係佢宣揚哲理嘅手段，功夫亦都一樣。」他表示小龍的每一哲理都是身體力行親身試過，而不是憑空想像，他說：「假如有人將小龍嘅思想集成書，呢本就會係《小龍兵法》，可以用喺商場任何方面，媲美《孫子兵法》。」
採訪：戴彩煥、何永寧
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！