陳百強（Danny）離開咗大家已經20年，下月31號商台會喺機場亞洲博覽館舉行紀念陳百強拉闊音樂會，楊千嬅、梁詠琪（GiGi）、張敬軒、梁漢文、蘇永康同林一峰都有份演出，成班歌手噚日到商台宣傳，分享對Danny嘅感覺，林一峰同張敬軒都話媽咪係Danny嘅歌迷。
讚老公似Danny
原來千嬅係Danny嘅忠實fans，佢話：「Danny住瑪麗醫院時，我喺瑪嘉烈醫院做實習護士，當時好想用同行身份去瑪麗打探消息，當然因為病人私隱收唔到料，遺憾我遲入娛樂圈趕唔切同佢做朋友，我揀老公都想揀個樣似Danny，我覺得丁生（丁子高）對眼嘅內雙眼皮都似。」
GiGi話同老公聽Danny嘅歌聽到喊：「我哋一齊聽《漣漪》，解釋歌詞意思佢知，佢都讚Danny把聲好柔好舒服，我兩個聽到兩行眼淚。」GiGi仲話老公對香港文化好有興趣，一齊睇港產笑片，老公都識笑。
另外，楊千嬅前日下晝6點單拖去咗中環ifc嘅city'super，佢離開時見有記者影相，仲好心提醒記者小心唔好被人撞到。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！