噚日有內地記者爆料，直指華潤集團董事長宋林涉嫌貪污，搞到華潤系股份全部跌到一仆一碌。案中主角華潤電力（836）當然傷得最勁，插低一成收報17.98元。不過，華潤創業（291）就無辜捱跌，仲一度唔見6%，好彩收市前買盤明顯增加，跌幅收窄至2.4%，收報23.95元，成交1.35億元。
麥格理維持中性評級
今次貪污事件會發展成點，究竟仲有乜嘢驚人消息仲未爆出嚟，真係冇人知。暫時撇除呢個不利因素，睇番華創核心業務，似乎都不及當年勇，首季少賺逾六成，令人大失所望。
零售業務是華創的主要命脈，不過該業務首季經常性利潤錄得6%跌幅。傳統上，首季表現係主宰全年零售表現的關鍵季度，簡單啲講，如果首季盈利唔好，都會影響到華創全年業績。
雖然麥格理發表報告指，華創4、5月零售同店銷售增長改善，不過用咗太多錢做宣傳，搞到毛利率受壓。加上據消息指，內地經濟唔好，民眾消費減少，唔多唔少都令到華創食品及啤酒生意受到影響，所以麥格理維持中性評級，目標價輕微降至21.80元。
其實內地超級市場競爭越嚟越激烈，唔單止要面對網上超市的挑戰，普遍價錢都會平啲仲要免費送貨，仲有好多外國大品牌想喺內地搵拍檔開聯營。睇嚟華創今年業績想有重大突破都幾難，未持貨的散戶，都係唔好亂咁衝入去博撈底。
瑪姬兒