上周四嘅答問大會，焦點落喺絕食咗十日繼而暈倒嘅慢必，同埋即場救急扶危嘅食物及衞生局局長高永文身上。狼振英呢，冇乜人理佢喎，除咗林鄭月娥囉。事關身為政務司司長嘅林鄭，見到有議員走近特首面前擲物，雖然擲唔中，但按慣例都要表達吓不滿嘅，所以佢都行禮如儀，正式去信立法會主席曾鈺成，表示唔能夠接受議員咁做，行為嚴重干擾秩序，搬出議事規則話，與會嘅公職人員同議員應有同樣保障同尊重喎。林鄭開到聲，曾鈺成點都要回覆吓，曾主席話見到有議員喺會上行為極不檢點，已經即時叫佢哋離開會議廳，按晒議事規則辦事，換言之冇乜好跟進。