黃翠如同黃浩然主演嘅無綫新劇《師父．明白了》，睇完前晚播嘅第二集，有觀眾硬係覺得成個故事有啲唔係好明，明明係一套古裝片，加插咗啲港式對白都叫見慣不怪，點知造型方面亦好創新，翠如BB、梁嘉琪、樂瞳同梁珈詠呢四姊妹，喺條腰各自掛住個極現代嘅腰袋，黃浩然嗰件藍色戲服仲似十足風褸，甚至連衙門都整到好似警署咁，裏面有塊類似白板嘅落地木板，可以貼晒通緝犯嘅樣，再開會討論點捉賊，人人仲自己有張枱，好有回到未來feel。
收視唔失禮
噚日監製陳耀全喺電話度話：「我都有睇到大家嘅評論，呢啲嘢係我刻意嘅設計，我希望可以營造一啲漫畫feel，可以話係modern版嘅古裝戲，其實喺好多地方，都有好多呢一類嘅古裝劇，呢一個亦係我預期嘅效果。」
至於噚晚播出嗰集，其中有一場戲話翠如BB分別同黃浩然、另外嗰三姊妹喺屋頂談心，背景仲有一個好大嘅月亮，睇怕又係監製專登設計。劇情跟住發展會話四姊妹拎住塊玉，幫羅蘭姐搵番失散咗嗰四個親生仔女，黃浩然會喺翠如BB身邊扶持佢，最後啲感情線會慢慢浮現喇！
收視方面，對住《衝上雲霄II》入面Sam哥同Cool魔嘅懾人魅力，《師父》嘅收視都唔算失禮，第二集平均收視有26點（約167萬觀眾），最高收視有30點（約193萬觀眾），監製都話：「我覺得OK㗎，不過最開心係我哋呢套劇嘅團隊合作得好開心，而且又齊心同投入，所以我有信心呢套劇收視會越嚟越好。」
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！