今日心水係嘉輝化工（582），睇好佢係因為之前好多落實被收購嘅殼股，股價已較收購價累積倍倍聲升幅，但嘉輝現價0.49元，較內房藍鼎控股嘅全購價0.339元只升咗44.5%，淨係呢一點已經好抵玩！佢新主藍鼎集團又非常猛料，短短五年，總資產由1億人仔膨脹到最新嘅120億人仔，而公司高級管理層都係嚟自國有銀行高層，背景好強！不過更重要嘅係，藍鼎肯用13.2億元買嘉輝隻殼，日後嘅注資規模肯定好大，所以要買趁手！
注資谷大冇走雞
目前藍鼎總裁孔繁波，之前係農業銀行（1288）省級分行行長，今年先加入藍鼎；副總裁曹雨雲，就嚟自農業發展銀行，佢職位仲高，先後做過農業發展銀行財務部處長，同埋總行副行長、總經理，前年加入藍鼎。搵得兩大銀行高人加入，藍鼎肯定想大有作為。其實，大股東兼主席仰智慧仲厲害，今年先42歲，除咗請得郁兩大高手入局外，更於短短五年內就將藍鼎嘅總資產run到去120億人仔，小弟估計佢嘅背景絕對唔簡單，仲肯定係財技高手。
以安徽為基地嘅藍鼎集團，截至2012年，建設開發地產項目達15個，起好加埋起緊嘅總面積達1,200多萬平方米，而舊年藍鼎房地產銷售收入達到60億人仔，呢個面積同金額絕對係龍頭尾、二線頭嘅級數。藍鼎近年集中買地，淨係舊年年尾半個月內，就用咗50億人仔，成為2012年合肥土地市場最大嘅買主。不過，話就話50億元，但除番每平方米嘅成本價都係300幾蚊人仔，好平，利錢好高，如果只將部份注入嘉輝身上，已經不得了。
總結嚟講， 藍鼎花得13.2億元買嘉輝隻殼，之後一定會想辦法谷大個市值，方便之後做融資，最簡單直接就係做注資，所以肯定嘉輝係大茶飯。睇番嘉輝個股價走勢，自上月28日公佈被收購消息及復牌後，股價長時間喺0.40至0.50元之間整固，有啲似之前隻金地商置（535），收一輪貨先爆上。粗略計算，復牌至今呢13個交易日嘅大手平均價要喺0.45元之上，所以現水平介入好安全，而且藍鼎係無條件全購買咗51%，有一定保障。如突破0.55元阻力，量度升幅可見0.96元。
陳承龍
本欄逢周四刊登