【銅鑼灣謝斐道】現年36歲嘅前亞姐黎淑賢，近日是非多籮籮，先係同美容醫生許智政嘅婚姻傳出亮起紅燈，仲喺離婚一事上同羅霖出現羅生門事件。羅霖早前爆話介紹咗律師畀黎淑賢搞離婚，但當事人話冇件咁嘅事，仲否認離婚，件事激到羅霖死死吓，仲暗嘲黎淑賢係嘻嘻哈哈虛偽嘅朋友。
友人食拉麵
事實係點佢哋先知，但黎淑賢真係有嘻嘻哈哈喎！好似前日黃昏6點半，黎淑賢嘅司機開住積架房車，車佢到銅鑼灣謝斐道近日排晒長龍、等閒都要排個幾鐘嘅一蘭拉麵店門外，原來黎淑賢發現有兩男一女友人喺度排緊隊，仲差唔多排到。黎淑賢同排緊隊嘅女友人一碰面，就開始雞啄唔斷嘻嘻哈哈笑得好大聲，完全唔似婚姻有問題，隱約仲聽到個女士讚黎淑賢keep得好，冇肚腩，搞到佢笑得不知幾開心，仲摸住自己個肚。
吹完水後，黎淑賢見朋友差唔多可以入去食麵，佢就上返自己車離開，但其中一個排隊男友人就有啲奇怪，佢居然放棄排咗好耐嘅位，走埋去黎淑賢架車傾咗兩句後就跟埋上車，剩番一男一女友人入去食。
採訪、攝影：梁繼光
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！