今日就係書展，除咗𡃁模出寫真，連男模都話要分一杯羹，周秀娜三位師弟何浩文（Dominic）、趙勁皓（King）同埋「翻版黃曉明」顧又銘都分別出寫真，噚日佢哋到灣仔會展攤位幫手做咕哩，盡情晒power，一個人抬幾盒書，顧又銘抬抬吓仲扯起件衫騷腹肌。
Dominic啱啱同糖妹分手，有傳佢用咗糖妹英文名Kandy做寫真書名博宣傳，搞到分手收場，問佢見到本寫真會唔會觸景傷情？Dominic話：「唔會，都唔關事，我最近都好忙，有嘢做心情就OK！」佢仲話一定會送本寫真畀糖妹。
Diva股搽豐胸膏
做過A&F男模嘅King以前做過倉務員，所以抬貨對佢一啲難度都冇。嚟自北京嘅顧又銘係第一次嚟書展，所以感覺好新鮮，問佢哋怕唔怕擺埋一齊賣困獸鬥？Dominic話：「唔怕，都唔同類，我係甜品食譜、King係教人做gym、顧又銘係唯美，咁最好三本都買晒嚟睇。」
另外，許珮榆（Diva）都會喺書展出寫真，希望憑32E青筋胸同長腿俘虜宅男，影寫真時為有最好狀態，Diva每日喺上圍同pat pat搽豐胸膏。新人洛詩同樣會出寫真，仲喺香港、北京兩地取景，造型係魔鬼同天使嘅混合體，當中梗係唔少得一啲性感造型啦！而今年初為人母嘅朱茵以囡囡黃鶯做題材出散文集《6磅10安士》，分享懷孕期間嘅心路歷程，裏面啲相都係由朱茵同阿Paul操刀，問點解出書？朱茵話：「係送畀囡囡嘅情書。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！