星二代子女越大越省鏡，王敏德與馬詩慧所生的20歲大女王曼喜亭亭玉立變索女，鍾鎮濤與章小蕙所生的女兒鍾嘉晴（Chloe）於5月剛滿18歲，由細到大都是肥妹仔一名的她都變身美少女，甚有母親年輕時的影子，在她的Instagram中，她不時上載化妝扮靚相，一束長髮的大B女更搽上睫毛液、鮮粉紅口唇膏，包包面不見了，顯得有點清秀，亦有穿上低胸性感晚裝，露出事業線，更有同學仔大讚她靚女。大B女是飛輪海粉絲，日前炎亞綸在港開個唱，她更入後台與他合照，並留言轉述炎亞綸的鼓勵說話。
赴英進修時裝
記者昨日致電范姜，大讚大B女靚女，她笑言：「個個少女大個都鍾意扮靚，我都有教佢化妝，佢細細不嬲都鍾意扮靚。」問到大B女會否有意入娛樂圈？范姜說：「佢唔鍾意唱歌幕前表演，佢鍾意畫畫、時裝。」問到大B女越來越靚女，會否怕她拍拖去夜街？范姜表示：「佢都有男同學仔朋友，未算係拍拖，我哋屋企唔准去夜街，同埋嘉晴都好有discipline。」范姜表示計劃安排大B女到英國修讀時裝：「我哋仲未傾，佢唔捨得屋企人、同學，鍾意留喺香港，不過佢對時裝有興趣，有時畫鞋、畫帽，最鍾意Marc Jacobs、Alexander McQueen嘅設計，若然佢想入行當然唔反對，不過唔好玩玩吓，會浪費時間、曇花一現。」
採訪：唐如
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！