網龍（777）噚日公佈同內地搜尋引擎一哥百度簽署諒解備忘錄，將原本諗住分拆上創業板嘅91無綫，改為賣畀百度，消息拖累網龍單日急插21%。點解跌得咁甘，事關91無綫主打手機遊戲業務，係會生金蛋嘅鵝，賣斷嘅話，網龍嘅科網鴻圖自然大打折扣。
追落後+阿里概念
之不過咁，以91無綫最新估值147.4億銀計，網龍持股57.4%，出售可套現84.6億銀，連同手頭淨現金19.3億銀（截至今年首季），交易後手頭現金將達104億銀，較市值97億銀還要高，集團表明有意派特別息，短線有望喘穩，中線就要睇套現後嘅收購動作。
市傳阿里巴巴敲定來港上市，噚日科網股整體表現唔算失禮，龍頭騰訊（700）再創上市新高，金山軟件（3888）亦一度炒高近半成。阿里巴巴概念股之一嘅中國動向（3818），噚日僅升1.5%，有力後來居上。
中動向年前透過附屬，入股阿里巴巴1億美元，以阿里巴巴集資千億計，其持股升值肯定勁到你唔信，加上體育用品股近排炒復蘇，中動向又多一個炒作概念，噚日即市一度升穿50日線，話唔定係轉勢先兆！
唐牛