狼英領導嘅班子最叻唔答問題就閃，令到一眾記者好頭痕。噚日政務司司長林鄭月娥主持完一個展覽嘅開幕禮後，就喺幾個保安護送下離開，點知記者未埋身追問，藝人黃耀明率先喺電梯口攔截林鄭，送上今日書展先有得賣嘅新書《大愛同誌》。被「突襲」嘅林鄭一邊接書一邊問：「本書係咪講同性戀㗎？」其後貫徹快閃精神，懶理記者提問就走人。
明哥話林鄭係第一個收到新書嘅讀者兼高官，希望司長用心睇完本書，了解多啲性小眾嘅生活，支持香港嘅平權運動同反歧視法。明哥仲話近年唔少國家同性婚姻合法化，同性戀漸漸得到認同，社會應該畀啲空間討論。