【台北】已經有13年冇拍台劇、40歲嘅孫耀威，最近同台劇女王楊謹華合作偶像劇《女王的誕生》，所以會喺台北住一段日子，佢自己都話要學做台北人。老孫女友、32歲嘅陳美詩過咗台灣探佢。前日老孫帶住女友同一個中年婦人，喺台北東區行街食飯，老孫打扮平實，陳美詩孭住個Chanel小手袋，平淡中見富貴。
鍾情瑪莎拉蒂
餘興節目就係去睇意大利名牌跑車瑪莎拉蒂（Maserati），去到陳列室老孫對一款GranTurismo 4.2 Auto黑色跑車情有獨鍾，呢款車定價成618萬新台幣（約160萬港元）。老孫對住件大玩具不知幾興奮，上車落車又開門又關門，只欠未開車出街跑番轉，而女友陳美詩好似唔係好感受到男友嘅興奮，冷冷咁企喺一邊。
正當老孫睇足十幾分鐘都未厭嘅時候，佢司機就通水話佢知有記者喺度影相，佢即刻安排兩位女士入休息室，臨上的士前仲不忘問車行職員攞咗卡片，先跳上的士引開記者，等兩位女士可以從容離開。
不過講返轉頭，台灣用嘅左軚車香港用唔番，唔通老孫打算移居台灣長住？老孫透過經理人回應就話，不嬲都鍾意趁拍戲空檔睇樓、睇車，有計劃喺台買樓，不過仲未郁手。
撰文：李森
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！