「買買買係咁買！買完返去擺，擺到過期就要掟晒！」這宣傳咪亂嘥食物的廣告，有人話煩過「緊箍咒」，不過我就幾喜歡，勝在直接又入腦。其實呢首歌仲可送畀啲亂買球員嘅球隊，好似暑假前已用3,700萬歐元買入馬里奧葛斯的拜仁，日前又買埋巴塞新星堤亞高艾簡達拿（圖）。兩位球員同屬進攻中場，雖然葛斯可以踢邊，但都不禁令人爆一句：「你又買？！」
葛斯的收購早在4月已敲定，相信除真想得到佢個「人」，當時還起着歐聯決賽前擾亂多蒙特軍心，以及達「收天下兵器以弱諸侯」的作用。至於艾簡達拿，明顯是新帥哥迪奧拿加插自己西班牙人腳的重要棋子。兩位各有「作用」的球員齊集，卻未知他們在球場上的功能是否也適合拜仁，別忘記同類型球員還有卻奧斯，希望哥帥唔係嘥料之人。
巴塞亦很古怪，高價購得尼馬，放走韋拿，前線人腳算得以保持；但中場沙維又老一年，本以為終於到法比加斯同艾簡達拿擔大旗；點知後者竟被賣走咁大嘥。現曼聯又想提價買埋年輕當打的法比仔，如果佢都放走，實是令人費解到爆的決定。
利物浦今季已買入米洛列特、路爾斯阿拔圖、高路托尼及伊斯高艾斯巴斯4位新兵，其實紅軍近幾年都有同樣情況，一口氣買入大堆球員，最後發覺唔啱用又要清貨。今季一直有蘇亞雷斯離隊隱憂，相信紅軍更會繼續搵人。在此改吓歌詞送畀一眾大球會：「用得晒，先至好買！球星咁珍貴切勿浪費，大球會要『惜買』千祈唔好嘥！」
方柏翹
now足球評述員