曾經撰文話香港要搞第二支管治隊伍嘅中聯辦研究部部長曹二寶（圖），噚日有幸獲張曉明「帶」去立法會同議員午宴。據知同佢同枱議員，不斷質問佢究竟係咪想西環插手特區管治先？點知呢位曾經喺私下場合，拍枱大鬧前特首辦主任梁卓偉、叫特區政府咪喺調查西九問題上玩狼振英嘅西環奀官，竟然一反常態收斂晒，完全唔見以前嘅火氣，猛話外界對佢有「誤會」，聲稱自己只係話中聯辦等駐港機構，有權行使根據《基本法》喺特區嘅權利啫。公民黨黨魁梁家傑不忘挑機，同佢講及佔領中環問題，換轉以前嘅曹二寶，可能拍枱鬧人咯，但喺波士面前點可以咁囂張？所以佢索性唔答。