金管局前總裁任志剛去過九龍城平民食肆，噚日去返五星級酒店，不過就唔係食飯，而係參加德昌電機（179）股東會。
迴避敏感話題
任總可能諗住不在其位，不謀其政，加上近期人人討論政府應否收回粉嶺高爾夫球場，任總得閒都會打波，聞說佢最鍾意北上中山打高球，或者費事被人問到，唔知答乜好，佢噚日一見到記者就笑口耍手，然後走，未講hi，直接就講拜拜。
任總2009年冇做金管局總裁之後，翌年先後成為建設銀行（939）同埋德昌嘅獨立非執董。佢好揀擇，唔係做好多間公司嘅獨董，上市公司一年只開一次股東會。除非佢有嘢想講，否則家陣想見佢公開亮相都唔係咁易。
至於德昌主席汪穗中，噚日亦都係扮模特兒，畀記者影完相交差就走人了。