下個月就踏入業績期，市場充斥盈喜、盈警消息，部份霉咗好耐嘅水泥、鋼鐵股，就吐氣揚眉發盈喜！不過，消費類股份就冇運行，當中鞋股成為盈警鐵膽，先係達芙妮（210），繼而有九興控股（1836）。
美林劈價 高盛叫買
九興去年中期盈利增加3%至6,656萬美元，但上星期發盈警，預告中期少賺逾20%，意味今年上半年最多賺約5,325萬美元。美林發報告踩多腳，預計下半年生意仍然難做，銷售好難回復昔日光輝，利潤率亦會受壓。
此外，由於九興要調整銷售網絡，關閉更多店舖及降價促銷清存貨，今年零售業務可能又蝕錢，因此將今明兩年盈利預測下調18%及15%，維持「跑輸大市」，目標降至18元。
高盛就唱反調，叫大家繼續入貨，上望21元，較昨收19.12元仍有近10%上升空間，加上股息率料有5.5厘，總潛在回報可高達15%。
不過，睇番走勢圖，九興自公佈盈警後，股價短短兩日唔見近一成，大成交配合形成兩支超大陰燭，跌幅更要一浪低於一浪，並跌穿保歷加通道底部，短期弱勢難改。若失守19元支持位，可能去番舊年8月低位約17元。雖然根據彭博綜合數據指，有一半大行建議持貨，但在缺乏上升催化劑下，高息誘惑似乎唔太吸引，隨時收息都唔夠蝕股價，未入貨的散戶要三思。
瑪姬兒