翠如BB黃翠如同黃浩然主演嘅無綫新劇《師父．明白了》噚晚首播，唔知係咪又撞正另一個重頭劇《衝上雲霄II》都同日首播，論卡士，真係蚊髀同牛髀，難怪翠如BB喺微博度有感而發，留言話：「要開始派成績表了。演員，一個等待了很多年的夢，感恩有機會實現，很珍惜，也只想一直安靜努力去做．期望，有一天，能成為一個合格的演員。」
咀戲底線好高
嗱嗱嗱，要做一個合格嘅演員，點可能未拍過咀戲、親熱戲㗎！翠如BB就真係未拍過喎，佢之前拍嘅《心路GPS》同兩套古裝劇《師父．明白了》、《舌劍上的公堂》都冇咀過，但嚟緊嘅無綫新劇《愛我請留言》，做第一女主角嘅翠如BB，再同《師父．明白了》嘅監製陳耀全、編審石凱婷、黃浩然班底拍時裝劇，係講現實嘅愛情故事。現實愛情故事，一定唔少得咀戲、親熱戲啦。
翠如BB前日喺電話度笑言：「我都要問監製。」係咪預咗呢個劇獻出螢幕初吻？翠如BB話：「我底線好高，要睇劇本、劇情，拍呢啲戲要有多啲心理準備，煲吓碟，因為鏡頭前接吻嘅形體表達知識好貧乏。」至於咀戲嘅對手如無意外係黃浩然，翠如BB就十萬個放心：「浩然好容易帶對手入戲，有安全感，係個善解人意嘅好對手。」
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！