文憑試放榜，唔想繼續讀書嘅，可能會選擇繼續工作，如果學生識講「鶴佬話」，就唔使擔心，大可以入職司法機構。當然唔係做裁判官、法庭書記啦，而係做繙譯員。司法機構上周起，開始招聘繙譯員，有別於傳統，司法機構今次係想招聘識聽識講「惠東淡水鶴佬話」嘅精英。
翻查維基百科，原來喺內地惠州市惠東縣嘅部份村鎮，好多人都係講鶴佬話。呢份工都幾好搵㗎，應徵者只有中學程度就得，冇成績要求，時薪250蚊，職責負責喺法庭做傳譯、繙譯文件、謄寫錄音等。唔通內地自由行大舉殺到，令到案件、訴訟增加，搞到連法庭都要請懂得內地方言嘅人？