香港教育（1082）喺魚缸已不時爆出醜聞，勢估唔到喺教育界，都可以爆出大鑊嘢，旗下現代書院23名文憑試（DSE）考生竟然集體出貓，齊齊冇U讀。話就話香港補習巨頭之一嘅現代教育，與事件無關，但喺家長心目中嘅形象，可以話跳水直插冇水花。
不過講真，補習社形象一向麻麻，特別係近期有補習社竟然將歌手龍小菌打造為補習新星，問心，上堂嘅有幾多真係想聽書。
補習社搞咁多花臣，相信係因為自從香港取消會考、高考，變成一試定生死後，客源突然大減，令高中客生意難做。不過，咁唔代表教育冇得做。香港怪獸家長大把，小朋友幾歲大就帶佢去補習，一直補到入大學為止，所以補習個餅其實大咗好多。好似現代、英皇呢啲龍頭，一早撈埋小學雞生意，亦因為師資要求相比中學低，可以搞埋特許經營。睇番香港教育半年業績，小學雞業務收入增長26%，反而中學就跌23%。
只要夠出名，撈教育係唔差嘅，難怪咁多藝人好似鄧梓峰、楊婉儀、《巨聲3》冠軍廖仲謙都借名氣搞教育機構啦。
Fifi
本欄逢周二、四刊出