【灣仔】楊千嬅近排雖然忙緊拍《曼珠莎華》同《單身男女2》兩部電影，但仍不忘抽時間陪老公丁子高同囝囝丁進諾（Torres）。好似前日下晝4點幾，千嬅一家三口現身灣仔嘅寶馬showroom睇車，原來千嬅父母同工人都喺埋度，三代同堂一齊睇新車，感覺真係好溫馨。
現場所見，丁子高對寶馬全新3系320i GT好有興趣，新車車價40幾萬，而丁子高本身就係揸緊呢部車嘅舊款。丁子高走埋去研究部車又摸一摸車身，千嬅都抱埋囝囝去畀意見。不過，一向眼利嘅千嬅好快發現記者，即刻戴番副黑超，而丁子高就好掃興咁同老婆囝囝一齊離開。問丁子高係咪想換部寬敞啲嘅新車，佢表現到好無奈咁冇回應，而抱住囝囝嘅千嬅就打圓場話：「佢呀？佢得閒就睇車㗎啦！」
囝囝見慣大場面
現年一歲嘅Torres好精靈好可愛，佢見到記者哥哥影相都處變不驚，好明顯細細個已經見慣大場面。之後丁子高做司機接載成家人離開，千嬅同丁子高一齊揮手拜拜，心情勁靚。
採訪、攝影：徐錦池、李志明
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第一集足本放送中！速上：
http://hk.apple.nextmedia.com/livestream/channel/talk24