藝人徐淑敏老公黃浩竟然鍊贏利福（1212）老闆劉鑾鴻同星島（1105）老闆何柱國，以2億元買起免費報章《都市日報》，佢仲計劃大搞副刊、娛樂版，請埋狗仔隊，揚言接手後三年返本。實行要做新晉傳媒大亨咁款。
想新增派發渠道
黃浩之前搞食肆，或者畀錢徐淑敏做護膚品生意，都係講緊一千幾百萬嘅投資，無端端話拎2億元出來辦報，距離好大啫。佢接受訪問時話係自己錢，即使遲啲引入其他投資者，佢哋嘅持股量都只係5%至20%，佢本人會持大股，打算認真搞呢盤生意。
雖然佢7.1前後先決定買起《都市》，但已經滿肚密圈，話傾緊新增派發渠道，計劃加強手機同網上版，又會增強報紙內容，尤其係娛樂版，諗住加強人手，甚至請狗仔隊，指「香港人都係鍾意睇狗仔隊、突發嘢，偷影嘢」呢個唔知係咪佢親身經歷嘅心得呢？
佢仲信心爆棚到，叫徐淑敏走去問肥佬黎意見。佢話，徐淑敏早兩日去錄《亂噏24》，都有叫佢同肥佬黎講話「我老公可能想做喎」，點知肥佬冇理佢，「費事我學嘢啩！」
只做過姊妹公司股東
對於有人話黃浩曾經係《都市》股東，黃浩就澄清話，只係做過《都市》一間姊妹公司嘅股東。佢強調，呢件事好戲劇性，「最開始瑞典人係搵我介紹，睇吓有冇人想接手，點知同幾個朋友傾唔成，就提議我買」。
冇物業揸手 租住比華利山
黃浩忽然話拎2億元出來辦報，大家即刻關注佢副身家究竟有幾豐厚。翻查紀錄，佢名下有7間公司，冇一間持有物業，佢𠵱家住緊大埔比華利山別墅銀池道一幢4300方呎別墅，都係租嘅，市值租金約5至6萬元。
此外，黃浩同啱啱入獄嘅陳振聰都有啲關連。陳振聰早於2008年以3,000萬元，買下黃浩喺中環嘅壽司店；陳振聰今年初受浸成為基督徒，黃氏兩公婆都有在場見證。
李華華
mailto:[email protected]
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第一集足本放送中！速上：
http://hk.apple.nextmedia.com/livestream/channel/talk24