我一直崇拜《金融時報》名筆Simon Kuper，文字簡單易明，選材生動觀察力強，但我亦明白在中文媒體寫文章，即使寫到識飛，都唔會有英文健筆所擁有的全球影響力。
Simon Kuper早前在《金融時報》寫，無論中國經濟上幾叻，連法國Club Med渡假集團都可能要出售畀大陸佬，但始終西方在意念、文化、教育、語言、書籍、媒體、名利場、品牌、甚至夢想，仍在全球佔有優勢，佢認為西方呢堆文化產品，比較適合世界一般普羅大眾的腦袋。正如英國小說家羅琳創作《哈利波特》、美國Pixar創作動畫片怪獸公司、怪獸大學，一定比乜嘢灰狼狼喜羊羊適合普羅香港小朋友，你會叫子女睇George R.R Martin嘅Game of Thrones，而唔係郭敬明愛情小說囉。中國經濟崛起，無改變到西方優勢，反而令其文化版圖更大，西方文化已主導全球life style，一個碧咸到訪上海，搞到成班大學生人踩人。
中國對世界文化冇影響力，官方即使再泵水，成立多100間孔子學院都係嘥氣，問題在於中國體制下，根本唔鼓勵創意，而西方文化優勢，並非只建基於龐大經濟實力，還包括一個相當核心嘅價值：自由。
而香港，在英殖時代得享相對其他亞洲地區較大嘅自由，曾幾何時，打破西方文化主導優勢。港產片係中國文化產品唯一成功向西方輸出，也輸出功夫明星李小龍，成為全球名人。
歐美及日本一直對香港所以另眼相看，其實與香港文化形態有關，一種現代華人life style，擁有英語教育、媒體、中產life style，接近西方普世價值，而非exotic，雕龍雕鳳、紅紅綠綠嘅「中國樣辦」。香港地位回歸後有改變，但真正大滑坡，當數689當選之後。
搞到香港地位大跌
689聲稱重視內交，同內地省市中央部委打交道，一年下來，唔見得有乜作為，其受重視程度比前兩任仲低。老董、煲呔仲可以挾洋自重，內地官場畀面人多，689之紅色背景，在內地官場根本唔sell，講黨性黨齡黨內政治水平，是但抽個江門市、鶴山市長都強個689，香港地位唔大跌有鬼。
早前689訪美，華盛頓cold shoulder佢已經表達一種姿態，在彭博通訊社訪問多次「no comment，I cannot comment、I am not commenting……」更成為中外傳媒笑話。香港經營多年、建立在東西方之間的特殊地位，對內對外均曾佔有利位置，睇怕最終要毀在茂利689手上。
PS：我將本欄結集成兩本書，書名就叫《茂利689》及《嘰嘰兵治港》，本周書展期間正式公開發售。
添馬男