現時世界上跑得最快嘅4個男人，竟然有兩個出術！美國百米飛人基爾同牙買加嘅鮑維，周日齊齊承認分別喺自己國家嘅例行藥檢「肥佬」。鮑維話自己毫不知情，而基爾即時退出下個月喺莫斯科舉行嘅世界田徑錦標賽，仲好man話會承擔任何處分！
根據國際田徑聯會紀錄中，𠵱家史上百米跑得最快嘅10個紀錄，由牙買加嘅保特、禾漢比歷克、鮑維同美國嘅基爾4人包辦。可惜「4大飛人」呢個神話喺周日，蒙上咗用「1:99」都洗唔甩嘅污點。做出今年最快時間9秒75嘅基爾，承認早前藥檢出咗事，但係就堅持成件事係意外。30歲嘅佢話：「我冇講大話，今次係我信錯人先出事，係我唔啱，我會接受任何處罰。」佢仲即時宣佈退出周五嘅鑽石田徑聯賽摩納哥站，同下個月嘅世錦賽。雖然基爾好合作，但係睇番同胞基寧嘅紀錄，前者都可能會被罰停賽一年以上；已經30歲嘅基爾，飛人生涯可能就咁玩完。
鮑維：我冇食過
不過喺基爾自爆藥檢「肥佬」之後幾個鐘，牙買加嘅鮑維都話自己都過唔到早前嘅國家藥檢，成為該國藥檢肥佬嗰5個人嘅其中一個！京奧奪得4x100米接力金牌嘅鮑維就話自己唔知情：「我從來都冇喺知情或自願嘅情況下，食過任何含有禁藥成份嘅藥物。我從來都唔係一個騙子，將來都唔會係！我嘅團隊將會進行調查，追查呢啲禁藥點解會出現喺我身體入面。」
禁藥醜聞一出，基爾同鮑維都即時一身蟻。雖然前者態度合作且正面，但係贊助佢嘅adidas都係第一時間跳船，終止與基爾的合約。至於現時喺意大利東北部練習緊嘅鮑維，周一俾當地警方突擊搜查房間，所有藥物都被充公，之後會進行化驗睇吓藥物成份有冇含有禁藥，據了解暫時冇人被捕。