今年潮語，「佔領」一定榜上有名，今次嘅目標係神聖不可侵犯嘅富豪樂園──粉嶺高爾夫球場……嘅上空，不過參與人數係零。
自資三萬 易升難降
話說高登男神、立法會議員范國威（咖喱范），睇唔過眼班建制派同發展局局長陳茂波落親區都玩失蹤，忽發奇想買部好似遙控飛機咁樣嘅高空攝錄器返嚟，好似𡃁仔咁放飛機，睇吓呢個成個荃灣咁大嘅高球場係乜嘢樣。
Gary話，架機喺外國訂返嚟，上面有4塊葉、電池、GPS定位，同埋靈魂──相機，全套3萬幾蚊，不過易升難降，起飛就嘭嘭聲，降落就要搵平路，操控唔係咁易，拍攝當日成架跌咗落變電站內，好彩執得返，不過機葉就爛咗，Gary話買定10套8套機葉做後備。佢仲話低飛唔止容易撞爛，如果班打緊golf嘅富豪睇唔過眼，搵嘢掟上嚟，部機一樣渣都冇。
new media至強嘅佢，上個禮拜六影完，噚日朝早就拎上發展事務委員會度播，另類質詢睇到大家眼定定；Gary話，單嘢因為事先張揚係「佔領」，大埔警署打去佢office又打佢手提，驚死佢聚眾生事。Gary話重頭戲係影將軍澳堆填區，由日出康城住戶嘅窗口出發，影環保大道點運垃圾，同埋麻鷹喺高空集結嘅景象。
李八方
mailto:[email protected]
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第一集足本放送中！速上：
http://hk.apple.nextmedia.com/livestream/channel/talk24