內地第二季GDP揭盅前傳聞多多，最終公佈數字卻是非常平實嘅7.5%，港股即市曾表現亢奮，最多升過百幾點。之不過噚日大市焦點明顯喺節能環保及科網股身上，事關總理李克強上周五召開國務院常務會議時，表示會研究部署加快發展節能環保產業，促進信息消費，拉動內需，從而推動經濟轉型升級。有業內人士估計，相關產業投資額可達萬億元。姑勿論投資規模有冇咁勁抽，中央對呢兩個板塊嘅重視程度不言而喻，預計可以長炒長有。
今日推介嘅風電股華能新能源（958），絕對係環保板塊核心成員之一，近排好消息源源不絕，先公佈上半年發電量按年大升53.5%，至595萬兆瓦時，繼而再發盈喜，受惠限電情況紓緩、投資裝機規模增加及生產經營管理水平提高，預計上半年盈利按年大增逾倍，以去年同期每股盈利約3.68仙計，現價（2.90元）年度化市盈率廿倍唔夠，以增長股嚟講絕對便宜。早排發盈喜不升反跌，相信係獲利盤沽貨所致，話晒今年以來累計都升足一倍，高位回落反而提供低吸良機，噚日升穿10日線，現價可先投一注，升穿3元加碼，喺冇蟹貨下，隨時升到你唔信。
唐牛