財經即時新聞爭分奪秒，講鬥快，每單新聞早少少或遲少少出現，都可能影響到好多個零嘅交易。
預備稿照出街
噚日早上內地公佈最新經濟增長數據，無論勝預期或遜預期對中港股市都有影響，網上就瘋傳呢張相，CNBC應該係為咗快，整定條BREAKING NEWS嘅預備稿，諗住等數據一出，即刻將數字加上去填XXX位。唔知邊位仁兄咁快手，竟然將條預備稿出街，照出XXX%，咁就擺咗個烏龍了。
睇完呢張相，華華記得早年去一間重要藍籌公司做業績記者會，目擊眾多外電行家搶業績新聞稿嘅情景。呢間上市公司收市後公佈業績兼做記者會，當公關拎住一叠業績新聞稿行近記者時，一班趕住報即時新聞嘅行家就蜂擁走上去搶新聞稿，情況其實幾混亂。
好在港交所（388）後來收緊上市公司發佈消息嘅規定，基本上要喺港交所網站上咗通告，其他資料先可以出街，咁先至少見呢種情況。