政府推銷新界東北發展，變為全城討論政府應否收回粉嶺高爾夫球場，經營粉嶺同深水灣兩個高球場嘅香港高爾夫球會當然唔出聲住，保持觀望態度，更何況會長、即係機場管理局主席張建東唔喺香港。
傳赴美動手術醫病
聽聞，張建東向機管局請咗超過一個月大假，最快8月先返，好似話佢身在美國就醫，並非血癌復發，只係身體有舊患要做手術。
因此，機管局本月五號為慶祝15周年，喺金鐘一間六星級酒店，大排筵席舉行晚宴，前主席黃保欣（左三）、馮國經（左一）、前行政總裁林中麟都有現身，唯獨唔見現任主席張建東。
據在場人士所講，CY當晚係主禮嘉賓，但係致辭後匆匆離去。盛傳極有機會接替張建東，做下任機管局主席嘅「梁粉」羅康瑞，當晚就相對低調，冇預演主席，可能見到兩位前主席在場啩。