堆填區擴建被打柴，顯示了7.1後梁振英管治危機正加深，建制派保持距離。本來屯門打鼓嶺堆填區擴建，係風險系數偏低之項目，泛民地區議員一直象徵式反對，鄉事與建制派政黨聯手護航，鬧照鬧，總之夠票過便搞掂，各取所需。
老董落台前，建制派一直埋怨做保皇黨有辱而無榮，為政府不受歡迎政策護航，當然係會失選票，但保皇黨一直已攞盡政治酬庸，由行政會議一路食，有幾多攞幾多，到地區委任、勳銜、太平紳士，如果有政治道德，就唔應該鋪鋪清，工聯會就最擅長兩邊食。
民粹古惑仔 只搵着數
早在曾蔭權年代已受盡建制派折磨，泛民招數政府一早預知，計算支持票時早已剔除，但建制黨派往往臨尾扭計，佢哋知道自己係關鍵角色，因為一旦建制派公開反政府，民情輿論會更高漲，政府官員完全被動，泛民又再造勢令議題升溫，結果扭計之建制派即使最後投票前想轉軚，也因民情高漲而不敢造次。
靠保皇黨在議會內為政府護航，先至係施政風險所在，整個環境局團隊乃政治小學雞，以為政策游說只講理念、原則，其實呢一班烏合之眾欠缺政治能力，保皇黨由day one開始，已是純利益組合，毫無理念可言，小學雞團隊即使做幾多次政策游說，都會冇Q用，大道理人人都知，但埋枱傾乞票就係利益交換。而最搞鬼地方，好多時地區利益又往往涉及其他政策局，黃錦星、陸恭蕙同發叔有乜好傾，人地要起公路開發鄉紳早已囤積之農地，呢班小學雞冇權去改規劃，試問又點能夠close個deal？
捱到奶媽林鄭出動之際，成單嘢已經擺晒上枱，人人關注，交換利益就好困難，對家只會開出假條件，真正有私利之交換條件，點敢公開提出，發叔所以一直叫政府主動撤回從長計議，係等到熱力消退，公眾關注轉移，關埋門再講數未遲。
呢種惡質政治交易，因689民望低殘而氾濫，政府變盲毛，行過唔抽抽水就笨，結果事無大小，乞票都要做deal，保皇黨人人開價搵着數，政策風險越來越高，好事變壞事，小事變大事。可以預見所有乜嘢減廢計劃寸步難行，家居垃圾徵費唔使諗，邊個黨會上船？新焚化爐？諗都唔好諗。幾十年來，北京同工商界一直防民主派，其實建制派被培育壯大，早已變成一頭怪獸，又食又攞，每次借政治危機而擴大勢力，講到尾，咪又係一班民粹古惑仔！
添馬男