上周六去咗太平山頂，凌霄閣對出嘅廣場，十居其九都係強國人，難怪土炮餐廳翠華（1314）要喺度插旗。唐牛嗰日都有幫襯，經過大半小時觀察，雖然每張枱每日肯定做唔到25張單，但人流絕對稱得上暢旺，周不時都有排隊等位人龍。睇番翠華盤數，全年盈利增長25%，但上下半年分別賺約6.5億銀，按半年計零增長，成為放榜後洗倉原因，員工及租金成本係死穴，後者按年更勁升59%。
翠華近期有喘穩迹象，但歷史市盈率仍高達38倍，較快餐一哥大家樂（341）貴逾46%，點解可以有咁高估值？相信原因有幾個。首先，翠華成功為品牌升呢，由平民茶餐廳，變為以食品質素及服務行先嘅開飯地方，相反，幫襯大家樂嘅顧客依然好着重價錢，這小小的分別，造就翠華有更高嘅議價能力。另外，中國市場乃翠華未來嘅主戰場，去年收益勁增1.5倍，炒憧憬有價。最後就係基金已經囤重兵，為咗個成績表靚啲，點都要撐住個股價！
從圖表出發，翠華放榜後從未失守4元水平，戰友可以此為入市位，博有好消息令股價重拾升軌，惟跌穿3.80元就要講再見。
唐牛