美洲金盃分組賽進入尾聲，周一舉行B組最後一輪分組賽，其中暫列榜尾的千里達將面對洪都拉斯，誓要上演絕地反擊戰，力爭出線。考慮到洪都拉斯已經提早出線，今仗或會留力8強，宜捧千里達「讓球主客和」[+1]的「客勝」！ （球賽編號：星期一3；有線61及201台明日9:30am直播）
千里達在分組賽首仗領先1:0之下，最後只能以2:2踢和薩爾瓦多，至於上場更加爆冷以0:2不敵海地，兩戰得1分，排小組包尾。不過，千里達今場贏波的話，仍有機會以小組次名晉身8強，就算不幸只排第3，3戰4分的成績亦很大機會以最佳第3名出線；但不幸失分的話，出局機會甚大，因此千里達今仗肯定抱住背水一戰的心情出戰。
牌面上，千里達有史篤城射手堅韋尼鍾斯壓陣，而且此子在今屆賽事已經有進賬，腳風不俗，絕對有能力攻破洪都拉斯的大門。除此之外，右閘賀迪亦有英超經驗，出身阿仙奴青年軍，現效英冠的米杜士堡。
洪軍戰意成疑
洪都拉斯在今屆表現搶鏡，小組兩戰全勝，提早出線，分別贏海地2:0及薩爾瓦多1:0，兩場都保持清白之身，可見該隊踢法穩健，防守為先。論狀態，洪都拉斯當然勝過千里達，但狹路相逢勇者勝，講戰意，非勝不可的千里達肯定較高。另外，不排除洪都拉斯今仗會收起主力，留力踢8強，所以今仗看好千里達成功搶分，一於捧[+1]的「客勝」。文：咖喱
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange