張衞健嘅75歲媽咪余嘉碧，上個月喺尖沙嘴洲際酒店泳池游水遇溺昏迷，被送入伊利沙伯醫院深切治療部搶救，雖然情況一度危殆要插喉，好彩最後張母都吉人天相，早排已經康復出院。
孝順嘅健仔雖然要返內地拍劇，但得閒就盡量抽時間陪媽咪，早排陪完媽咪行山，噚日又陪媽咪游水。
借母鼓勵大家
曾經遇溺嘅張媽媽好堅強，喺泳池跌低就喺泳池企番起身，實在值得大家學習，難怪健仔都將媽咪游水相放上微博，留言激讚：「我媽媽！一個月之前她在游泳時出意外，停了心跳，呼吸及脈搏兩次，每次好幾分鐘，今天她在那里（裏）跌下就在那里（裏）爬起來，從新游泳！她是我的榜樣，媽我向您致敬！」
好友吳國敬、陳法蓉都留言讚張媽媽威武，健仔噚日仲喺電話同馮仁昭話：「媽咪喺我屋企游水，佢𠵱家好好多，其他只係小毛病，佢真係叻媽，所以我都發微博鼓勵大家。」
撰文：馮仁昭
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第一集足本放送中！速上：
http://hk.apple.nextmedia.com/livestream/channel/talk24