韓亞航空航機在三藩市機場降落時發生嚴重意外，機毀人亡，只有三人死亡，算係奇蹟，三位都是中國女孩子中學生。至於肇事原因，有排查。初步消息，根據美國一啲航空安全專家講，就係飛機降落時由實習副機師操控，嘗試第一次在三藩市機場降落，鑄成大錯，但美國航空專家話：「實習機師操控，都唔算係大問題，但坐在他身旁嘅資深機師做緊乜嘢呀，點解唔及早糾正？」此則有待美國運輸安全局詳細聽兩位機師在最後一分鐘之對話錄音了。
前幾日談過之暢銷書（The Outliers），裏面有講到KAL（韓國航空）在九十年代頻頻遇上意外，請不少顧問做調查研究，最後決定廢除韓文為機組人員對話語言，要所有人講英文，之後意外事件急降，原因係乜？正如馬雲話齋，講中文唔敢話爸爸有錯嘅，講英文就唔同。講韓文要有恭敬語，上司對下屬有命令語以示威嚴，KAL改用英文之後，機組人員溝通比較直接、平等，冇咁多廢話與服從喎，究竟韓亞兩位正副機師在失事前幾分鐘係用英文還是用韓文溝通，值得查問。
韓亞班機有咁多中國學生，皆因中國開始放暑假，浙江江山中學係一間名校，不少畢業生進入北大清華，精英生直入耶魯哈佛，幾年來每年暑假安排遊學團到美國，每位收費五千美元左右。今年呢屆學生原定到洛杉磯West Valley Christian School上英文堂，學習英語，到迪士尼遊覽，參觀加州著名大學校園，仲會去矽谷一遊，到Google總部及附近嘅史丹福大學，提早領略美國生活經驗，畢業後就申請美國大學嘞。中國人富起來之後，撐起美國Summer Camp（夏令營）行業，每年暑假大量中國學生到美國參加英語夏令營，不同課程有不同收費，由二千美元至七千美元不等，最貴嘅收費達一萬二千美元！左丁山睇到呢啲消息，不禁感嘆自己真係行得太快，反而飲唔到靚湯。1997年有一個ACEP（American College Experience Program），香港中學生可到耶魯大學上英文課3星期，第4個星期到新英倫遊覽校園，包括哈佛、麻省理工、哥倫比亞等等，最後在紐約散隊，收費不足四千美元，辦到第三屆，缺乏香港學生參加，左丁山膽粗粗要求由自己承包（包銷），主辦單位拒絕，以後停辦。假如支撐到今日……