白天是動漫𡃁模、晚上變身捽碟DJ，Kammy平時少見陽光，那天她穿上背心短褲，跟62歲的獨木舟教練李卓凡（Eric）出海，一來keep fit，二來練臂力，捽碟更得心應手。
記者：徐嘉華 攝影：李忠浩
場地提供：海豚獨木舟會
對上一次見Kammy捽碟，是本地一項滑水賽，當時她長髮披肩，黑色bra top配短裙，朝氣十足。平時除在港捽碟，還會到國內disco出show；但原來小妮子也鍾情戶外運動。
教練冇睇過醫生
訪問這天是平日，但海豚會也有10多名年輕人參加第一日的獨木舟課程；香港大約有10幾個獨木舟會，海豚會是Eric 34年前在西貢大環村開的：「60年代香港的海水好清澈，於是開了海豚會，教獨木舟又會搞canoe camp，一來強身健體，二來可與朋友聯絡感情。」身上沒半點肥肉的Eric笑說，自己大半生玩獨木舟，未睇過一次醫生：「我連醫藥費幾錢都唔知，又冇肚腩，因為獨木舟要用腰力，想有肚腩都好難。」聽到Kammy手痕，立刻要落水。
Kammy：我唔識游水，學唔學到？男仔、女仔邊個學快啲？
Eric：小朋友學最快，因為他們的骨骼較軟，年紀大一點，好似去到3、40歲先學，關節已成型，唔夠靈活。其實我們這個場好識合初學者，因離岸50米嘅水深只到胸口，而且我哋初級3堂已教到你翻艇時如何自救，加上救生衣，只要游到50米就可以學。
𡃁模唔慣O字腳
Kammy：齋睇人划來划去，以為好易，原來一啲都唔易，最怪係對腳，要O字型咁坐，好唔慣，膝頭仲要頂住船邊，有啲難。
Eric：落水前要熱身，由頭到腳；我之前都講過划獨木舟係全身運動，就算雙腳都要不停喺艇內做蹬腿；由開始落槳時，用背嘅力帶動，之後用手、臀、腿力，一個循環咁做。經常玩可以收緊臀部，甚至大腿至小腿嘅肌肉。
變走拜拜肉 捽碟仲勁
Kammy經Eric指點後，第一次玩獨木舟已可掌握基本動作，佢仲話用得最多係雙手，正好幫到自己捽碟：「其實可以自己一手一腳划獨木舟，喺大自然嘅環境下真係好舒服，啱啱試過後覺得雙手最用力，相信可以變走拜拜肉，同埋練到手部力量。」
後記：張敬軒都玩
Kammy曾拍過不少廣告，亦曾與歌手謝安琪拍攝一個金酵素的廣告。巧合是，表舅母是謝安琪的張敬軒，也曾是海豚會顧客，曾經在海豚會附近居住的軒仔，兩年前玩過獨木舟，會內人士都大讚他學得快。
倪匡、蔡瀾同肥佬黎約埋一齊《亂噏24》，你睇咗未？
唔睇冇話題，第一集足本放送中！速上：
http://hk.apple.nextmedia.com/livestream/channel/talk24