上禮拜六，利物浦喺熱身賽以4:0大勝普雷斯頓，順便晒新馬！高路托尼、米洛列特、伊亞高艾斯巴斯同路爾斯阿拔圖4位新兵都有上陣；紅軍仲登特將佢哋「地標戰」嘅相放上facebook，等球迷一睹4大新援嘅風采！
友賽4:0炒英甲仔
呢場係利記今季第1場熱身賽，加歷查嘅接班人高路托尼同門將米洛列特踢正選；另外兩位西班牙仔先做後備。唔似同日喺泰國吃盡苦頭嘅曼聯，紅軍呢場面對英甲嘅普雷斯頓，踢得好輕鬆；靠菲臘比古天奴同小將伊比各入一球，利記半場領先2:0。
換邊後，羅渣士作出10個調動，到伊亞高艾斯巴斯同路爾斯阿拔圖落場。嚟自切爾達、身價770萬鎊（約9,022萬港元）嘅伊亞高艾斯巴斯表現對辦，佢先助攻畀史達寧射成3:0，最後自己仲入埋波，幫紅軍贏夠4:0完場。
賽後，米洛列特興奮到喺twitter留言：「超級開心呀！我嘅處子戰可以幫球隊大勝一場！下一站，我哋要參加遠東之旅！」利物浦喺亞洲咁多球迷，當然唔會執輸，佢哋好快就會飛去印尼，周六同印尼明星隊比賽。佢哋之後仲會去澳洲同泰國。